Vrasja e Anxhelinës, avokati i autorit tregon detaje të reja

Tribuna TV 04 Janar 2019

Avokati i Aleko Petros, që akuzohet për vrasjen e vajzës së tij Anxhelina, ka treguar detaje të reja mbi debatin që pati përfundimin kaq tragjik.

Duke folur për televizionin Star, avokati Vasilis Nulezas, ka përgënjeshtruar që autori i vrasjes të kishte ushtruar edhe më parë dhunë ndaj të bijës.

Sipas avokatit, “ajo çka shkaktoi krimin e tmerrshëm, ishte dashuria e ekzagjeruar, interesimi i jashtëzakonshëm dhe insistimi i tij i pajustifikueshëm që të diktojë jetën personale, profesionale dhe shpirtërore të vajzës së vet”.

Avokati tha se Alekso kundërshtonte lidhjen e të bijës me afganin, jo për motive raciste. Po për faktin se që nga nëntori 2017 ajo ishte larguar nga i jati dhe të afërmit e tjerë.

Avokati tha se Petro nuk ndodhej nën ndikimin e alkoolit gjatë kryerjes së krimit. Sipas avokatit, vrasja nuk ishte e paramenduar. Pas debatit që kishin midis tyre, e goditi me një send të fortë (levë hekuri) që ishte pranë sobës. Vajza u hodh nga dritarja, nga lartësi 2 metra që të shpëtonte. Aleko e ndoqi dhe finalizoi aktin kriminal, ngase “i qenë errur sytë”.

“Është penduar, qan vazhdimisht”, tha avokati.

Ai shtoi se Aleko Petro i tha që do të donte të ishte ai në vend të vajzës së vrarë dhe se në gjyq nuk do të kërkojë të merret parasysh asnjë rrethanë lehtësuese.

Ndaje me miqte