Pranga hajdutit shqiptar, zbulohet magazina me cigaret kontrabandë

Tribuna TV 08 Maj 2018

Policia greke ka arrestuar pas një operacioni rrufe një shtetas shqiptar të moshës 29 vjeç. Ai akuzohet për vjedhje me armë dhe armëmbajtje pa leje.

Bashkë me të u arrestua dhe një 32 vjeçar nga Pakistani, të cilin shqiptari e mori peng.

29 vjeçari shqiptar dhe dy bashkëkombës të tij -që tashmë janë në kërkim- shkuan në një magazinë në Kolono, ku mbaheshin produkte duhani kontrabandë.

Të tre ata u prezantuan si punonjës të policisë dhe nën kërcënimin e armëve morën një sasi cigaresh që i ngarkuan në makinën e tyre.

Mirëpo ata u diktuan nga një patrullë e policisë dhe filloi përndjekja, ku morën pjesë edhe përforcime nga rajoni i policisë i Omonias dhe Agio Panteleimonas.

Gjatë përndjekjes, 29 vjeçari iu kanos policëve me pistoletën që mbante në dorë, por policët mundën ta çarmatosnin e t’i kalonin prangat dhe t’i sekuestronin armën.

Më makinën që kishte ndaluar disa metra më tej u gjet dhe pakistanezi, viktimë e hajdutëve, ndërsa u arrestua pse si roje e magazinës akuzohet për shkelje të kodit doganor.

Nga kontrolli në magazinën e vjedhur u gjetën dhe u sekuestruan 21.645 paketa cigare si dhe 906 qese duhani që nuk kishin pullën fiskale, si dhe 46 fishekë dhe një sasi e vogël kanabisi. 

Nga hetimet rezultoi se ndaj 29 vjeçarit kishte dalë urdhër arresti ndërkombëtar i autoriteteve shqiptare për vepra penale që lidhen me drogën dhe armët.

Ndaje me miqte