Nënshtetësia greke, intervista e plotë me sekretarin e shtetit, Lambros Baltsiotis

ROBERT GORO 04 Nentor 2018

Sekretari i shtetit për nënshtetësinë në Ministrinë e Brendshme greke, Lambros Baltsiotis, në intervistë për TV Tribuna, ka bërë të ditur se së shpejti do të ulet tarifa (paravolo) që paguhet për aplikimin e marrjes së nënshtetësisë greke. Sipas tij, tarifa, nga 700 euro që është sot, do të bëhet 550 euro.

Baltsiotis ka shërbyer për shumë vjet si ekspert te Avokati i Popullit, një institucion që gjithmonë ka qëndruar e qëndron afër emigrantëve. Po ashtu dhe vetë Lambros Baltsiotis, që është dhe historian dhe një njohës mjaft i mirë i marrëdhënieve dypalëshe dhe i realitetit shqiptar.

Baltsiotis u emërua në këtë post në nëntor të vitit të kaluar. Posti i sekretarit të shtetit për nënshtetësinë, u krijua pas një iniciative personale të kryeministrit Tsipras, që kërkon përshpejtimin e këtij procesi.

Jo si një mjet për të tentuar votat e emigrantëve, por sepse dhënia e nënshtetësisë përbën një nga pikat e programit elektoral që SYRIZA ka dashur t’i qëndrojë besnike.

Përndryshe, ritmet e ngadalta në dhënien e nënshtetësisë, nuk i shërbejnë qeverisë aktuale për të vjelë votat e njerëzve, pasi numrat nuk janë kaq të mëdhenj, pavarësisht se ka një përmirësim kohët e fundit.

Në intervistën për Tv Tribuna, Baltsiotis tha se që nga viti 2006 e deri më sot, nënshtetësinë greke e kanë marrë 200.000 qytetarë shqiptarë. Shumica dërrmuese e tyre janë minoritarë grekë të ardhur nga Shqipëria, ose, siç njihen, homogjen. Por ka dhe një numër të konsiderueshëm shqiptarësh nga ata që administrata greke i quan si “alogjenë”.

Në intervistë, Baltsiotis, ka folur për vonesat e mëdha dhe mënyrën e trajtimit të këtij problemi.

“Njerëzit kanë të drejtë”, pranon Baltsiotis dhe thotë që me ndryshimet e reja që do të votohen së shpejti nga parlamenti,  do të tentohet një ulje me të paktën 9 muaj e kohës së pritjes.

Gjithashtu zyrtari i lartë i ministrisë së brendshme greke ka dhënë detaje se çfarë do të bëhet me personat me moshë mbi 65 vjeç dhe çfarë lehtësish do të kenë ata në procedurën e pajisjes me nënshtetësi greke.

 

Vijon intervista e plotë:

TV TRIBUNA: Zoti Baltsiotis, në më pak se një vit që ndodheni në këtë post janë realizuar ndryshime të rëndësishme në legjislacionin dhe procedurat e nënshtetësisë. Nisur nga fakti se nënshtetësia është një çështje shumë e ndjeshme për opinionin grek, a keni hasur në vështirësi gjatë përgatitjes dhe votimit të amendamenteve të reja?

LAMBROS BALTSIOTIS: Siç e dini, problemi më i madh në Greqi është në mjaft raste jo se nuk kemi ligje, por vuajmë për zbatimin e tyre. E njëjta gjë ndodh edhe me nënshtetësinë. Përtej ndryshimeve që realizuam në gjashtë muajt e kaluar dhe ato që do të bëjmë tani, vazhdojmë të kemi probleme në lidhje me zbatimin e ligjeve. Kryesisht me vonesat që vërehen, por edhe me arritjen e një procedure unike, të njëtrajtshme dhe tërësisht transparente.

Konsideroj se kemi bërë mjaft hapa në këtë drejtim, mirëpo ende nuk kemi rezultatin më të mirë, sidomos sa u përket vonesave.

 

TV TRIBUNA: Dhe vonesat  janë një nga problemet për të cilin ankohen më shumë bashkatdhetarët e mi; besoj që edhe ju e dini këtë. A po bëhet diçka që të përballohet ky problem?

LAMBROS BALTSIOTIS: Fillimisht, njerëzit kanë të drejtë. Për fat të keq, problemi është më i madh në rastin e fëmijve që po rriten në Greqi, domethënë ajo që themi “dhënie e nënshtetësisë për arsye të lindjes dhe arsimimit në Greqi”, kemi vonesa sidomos në qendrat e mëdha urbane. Njëlloj edhe në rastin e natyralizimeve (Politografisi). Për fat të keq, në qendrat e mëdha urbane ka vonesa shumëvjeçare që nga depozitimi i aplikimit deri në dhënien e intervistës.

Në javët e ardhshme do të përpiqemi që me një reformë ligjore – e cila përfshin mjaft gjëra – do të përpiqemi ndër të tjera që të ulim me të paktën 9 muaj kohën e dhënies së nënshtetësisë me natyralizim. Për të gjithë ata që aplikojnë. Do të shohim se si do të funksionojë në praktikë. Kjo është e sigurt.

Për vonesat që kanë të bëjnë me atë që i themi “neni 1A dhe 1B i Kodit të nënshtetësisë greke”, për arsye të lindjes dhe arsimimit në Greqi, për fat të keq vazhdojmë të mos mundim të gjejmë mënyrat e uljes së menjëhershme të kohës së pritjes. Është një problem që për fat të keq do të vazhdojë akoma për një periudhë, për aq kohë sa ekzistojnë këto numra të mëdha aplikimesh që nga vitet e mëparshme.

Këto ditë isha në Selanik dhe aty u përpoqëm me drejtoreshën e drejtorisë së nënshtetësisë që të shqyrtojmë mënyra për uljen e kohës, edhe te natyralizimi, edhe te fëmijtë. Besoj se do të kemi disa rezultate. Sigurisht, do të mbikqyrim edhe statistikat dhe shpresoj që situata të përmirësohet disi. Por gjithsesi, do të jetë larg të qenit e kënaqshme...

 

TV TRIBUNA: Një propozim që ishte bërë, domethënë, të merren dosje nga Selaniku p.sh., dhe të dërgohen për shqyrtim në një qark tjetër, ku ka më pak ngarkesë?...

LAMBROS BALTSIOTIS: Kjo është një ide që sigurisht nuk është një shpikje greke. Do ta shikojmë këtë pas 1 janarit 2019, atëherë kur në bazë të programit “Kleisthenus”, gjithë drejtoritë e nënshtetësisë do të varen direkt nga ministria e brendshme. Do të shohim se si mund të bëhet kjo. Gjithsesi, është në mendimet tona.

 

TV TRIBUNA: Para disa muajsh, parlamenti grek votoi disa ndryshime në lidhje me nënshtetësinë. Për mendimin tuaj, cilat janë ndryshimet më të rëndësishme dhe sa këto ndryshime e lehtësojnë marrjen e nënshtetësisë greke nga ana e emigrantëve?

LAMBROS BALTSIOTIS: Ndryshimi më i rëndësishëm ka të bëjë me atë që, në vitin 2010, për arsye teknike dhe jo se ishte në vendim i qëllimshëm i qeverisë së atëhershme, një numër i konsiderueshëm emigrantësh ishin përjashtuar nga mundësia e aplikimit për natyralizim (politografisi).

Me ndryshimet që bëmë, nga njera anë u shtuan disa leje tek ato që u jepnin mundësinë për të aplikuar emigrantëve që kishin 7 vjet qëndrim të ligjshëm e të përhershëm në Greqi.

Tashmë gjithë ata që kanë një qëndrim të ligjshëm e të përhershëm prej 12 vjetësh në Greqi, mund të aplikojnë.

Kjo sigurisht ka sjellë një rritje të numrit të aplikimeve për natyralizim. Besoj e me këtë logjikë, që natyrisht është logjika e çdo demokracie perëndimore, duam që njerëzve të cilët kanë shumë vjet në Greqi, t’u jepet mundësia të integrohen tërësisht dhe përgjithmonë në shoqërinë civile greke; sigurisht, nëse përmbushin kushtet.

 

TV TRIBUNA: A mund të na shpjegoni se për ç’arsye koha e qëndrimit në Greqi nga 7 vjet u bë 12 vjet?

LAMBROS BALTSIOTIS: Kjo nuk është një “patentë” vetëm greke. Mirëpo shumica e vendeve i japin prioritet nënshtetësisë nga tipa të caktuar të lejes së qëndrimit dhe më konkretisht, atë që e quajmë leje e rezidentit afatgjatë (epi makron). Ka në masë një politikë të përbashkët emigracioni në BE, e cila konsideron lejen e rezidentit afatgjatë si “paradhomën” e marrjes së nënshtetësisë me natyralizim.

Në Greqi, për arsye që lidhen edhe me dobësitë e administratës, edhe me evoluimin historik të flukseve të emigrantëve në vend, kemi një numër të vogël lejesh rezidenti afatgjatë. Të cilat sigurisht po shtohen, nuk jemi më në nivelet e 3-4 viteve më parë.

Që nga momenti që dikush nuk u përfshi në procesin e marrjes së njërës prej këtyre lejeve, konsiderojmë që, nga njëra anë nuk duhet të përjashtohet nga nënshtetësia, por nga ana tjetër, do të duhet të ketë një numër më të madh vitesh të qëndrimit të ligjshëm e të përhershëm në Greqi, një “garanci” minimale të integrimit në realitetin social, ekonomik dhe politik grek.

 

TV TRIBUNA: A ekzistojnë statistika lidhur me emigrantët nga Shqipëria që kanë marrë nënshtetësinë greke?

LAMBROS BALTSIOTIS: Po, sigurisht që ekzistojnë. Statistikat për nënshtetësinë mund të them se ndodhen në një nivel shumë të mirë. Para rreth një dekade nuk kishim statistika të mira. Tashmë, sa shkon e po përmirësohen dhe besoj se janë të shkëlqyera. Kemi numrin e saktë të qytetarëve shqiptarë që kanë marrë nënshtetësinë. Mbi bazën e të dhënave, kemi deri në këto momente që po flasim, 135.000 qytetarë shqiptarë që kanë marrë nënshtetësinë si homogjenë dhe rreth 55.000 janë qytetarë shqiptarë “allogjenë” siç u themi në gjuhën e administratës. Totali është rreth 200.000 sigurisht, shqiptarët përbëjnë shumicën dërrmuese të popullsisë që ka marrë nënshtetësinë greke.

 

TV TRIBUNA: Mbetem prapë te statistikat: Në raport me një vit më parë, si paraqitet fluksi i aplikimeve për marrjen e nënshtetësisë greke. Ndër ta, shumica janë për natyralizim, apo nga brezi i dytë.

LAMBROS BALTSIOTIS: Ka një rritje të aplikimeve për natyralizim dhe nga ana tjetër, kemi një rënie të vogël, por të dukshme, në aplikimet e brezit të dytë. Është e qartë që në vitet në vazhdim aplikimet për arsye të lindjes dhe të arsimimit në Greqi do të pakësohen edhe më tej, deri sa të kemi një fluks normal.

Sa u përket natyralizimeve, kemi akoma një numër të konsiderueshëm, i cili besoj se nga çasti që dikush e ka vendosur -sidomos pas viteve të krizës- të qëndrojë në Greqi, në një moment do të dojë të marrë edhe nënshtetësinë greke.

 

TV TRIBUNA: Nga kontaktet me bashkatdhetarët e mi rezulton se janë të shumtë ata që dëshirojnë të marrin nënshtetësinë greke. Kanë thuajse 30 vjet në Greqi, tashmë janë në një moshë të shkuar, por duan të qëndrojnë përgjithmonë këtu. Mirëpo u duket pak e vështirë procedura: duhet të kalojnë në test, të kenë çertifikuar mësimin e gjuhës greke, në kohën që fakti se jetojnë prej tri dekadash në Greqi dëshmon se kanë një nivel, qoftë dhe  minimal komunikimi në greqisht. Për këtë kategori, ministri i mëparshëm Skourletis, kishte thënë se po përgatitet një zgjidhje. A ka diçka të re në këtë drejtim?

LAMBROS BALTSIOTIS: Besoj se do të kemi muajin e ardhshëm votimin e një amendamenti që e kishim paralajmëruar që nga marsi 2018, por e vonuam. Ka të bëjë me ata që janë mbi 65 vjeç. Në kuadër të procedurës së re që do të vendoset besoj që nga janari 2019, lidhur me natyralizimin, procedura e re do të ketë dy aspekte, dhe e theksoj këtë, pse ngandonjëherë ka keqkuptime. Kemi thënë që do të ketë një bankë me 300 pyetje. Aplikantit gjatë testit do t’i bëhen 30 pyetje  dhe po u përgjigj pozitivisht në 20 prej tyre, do të kalojë. Ky është njeri aspekt.

Njohja e gjuhës do të vazhdojë të kërkohet, siç kërkohet edhe deri tani, madje në disa momente mund të themi që vështirësohet, sepse do të jetë i domosdoshëm shkrimi me alfabetin grek minimalisht. Si dhe kuptimi i një teksti të thjeshtë në greqisht.

Për ata që janë me moshë mbi 65 vjeç, do të ketë një rregullim të veçantë që parashikon se testi do të jetë mjaft më i lehtë dhe kërkesat për komunikimin verbal në greqisht do të jenë të njëjta – dhe në këtë pikë shqiptarët në Greqi nuk e kanë problem. Për këto mosha (65 vjeç), nuk do të ketë test me shkrim apo shpjegim i kuptimit të tekstit.

Drejt kësaj po orientohemi dhe është një model që zbatohet në shumë shtete europiane. Në disa raste procedura është më e hapur se në Greqi, madje nuk i nënshtrohen thuajse asnjërit prej këtyre testeve, as gjuhës. Konsiderojmë se në Greqi nuk ka arsye -në kushtet që ka evoluar emigracioni- të avancojmë në heqjen e disa prej kërkesave.

Mos të harrojmë se edhe vendet që nuk kanë testin e gjuhës, kanë kërkesa të tjera, si p.sh., të performancës tatimore në rritje. Në Gjermani p.sh., po të jesh me moshë mbi 65 vjeç mund të mos kërkojnë të dish gjermanisht, mirëpo nëse jeton me kompensime sociale nga shteti gjerman, nuk mund të marrësh nënshtetësinë.

 

TV TRIBUNA: ma merr mendja që kur të votohet amendamenti për moshën mbi 65 vjeç e lart, ndoshta mund të ketë një “bum” aplikimesh. Megjithëse njerëzit disi frenohen për shkak të tarifës (paravolos) 700 euro që konsiderohet tepër e lartë, kur e krahason edhe me vende të tjera europiane.

LAMBROS BALTSIOTIS: Paravolo prej 700 eurosh në raport me të ardhurat për frymë në Greqi, është ndër 3 – 4 më të shtrenjtat në BE. Do ta ulim, do ta bëjmë 550 euro. Madje shpresojmë që këto para të shfrytëzohen tash e tutje për të përmirësuar gjithë procedurën, domethënë, ato para “t’u kthehen” me shërbim cilësor atyre që i kanë paguar.

Ndërsa lidhur me aplikimet e njerëzve që janë mbi 65 vjeç, nuk besoj se do të ketë një “bum”. Besoj se nuk është për shkak të paravolos, por vlerësoj se nuk janë kaq të shumtë ata që do të dëshirojnë t’i nënshtrohen kësaj procedure, qoftë dhe me masat lehtësuese që do të ketë.

Domethënë, nuk kam frikë – ky është vlerësimi im- se do të rëndohen jashtë mase shërbimet. Dhe këtë e bazoj në të dhënat statistikore, që kemi faktikisht, se sa pak janë ata me moshë mbi 65 vjeç që po aplikojnë tani.

 

TV TRIBUNA: Jo vetëm unë, por dhe mjaft prej bashkatdhetarëve të mi, ju njohim prej vitesh nga puna juaj në institucionin e Avokatit të Popullit. Ashtu siç kemi ndjekur nëpër vite edhe qëndrimet tuaja në përkrahje të të drejtave të emigrantëve. Nëse do të ishit sot te Avokati i Popullit dhe gjykonit këtë paketë masash që u morën kohët e fundit për nënshtetësinë, a do të mund të vlerësonit se me këto masa është lehtësuar edhe më shumë përqasja e emigrantëve në nënshtetësinë greke?

LAMBROS BALTSIOTIS: Shikoni, ka dy gjëra të ndryshme. Duke konsideruar se dispozitat e reja që do të paraqesim në parlament do të votohen, dhe po të marrim parasysh se kemi dispozita që lidhen me fëmijë që kanë invaliditet; fëmijë me të meta mendore; të sëmurë psikikë; heqja e periudhës së detyruar një vjeçare pas marrjes së nënshtetësisë që të fillosh punë në shtet -ky ishte një premtim i mbajtur i ministrit Skourletis, pas propozimit që bëri Lëvizja për Ndryshim (KINAL)-; të gjitha këto besoj se plotësojnë një përpjekje totale të shtetit grek për një modernizim të kuadrit ligjor për nënshtetësinë. Në këtë sens, do të thoshja se me kuadrin ligjor jam i kënaqur.

Çështja është se si po shkojmë me procedurat. Dhe e dini se nënshtetësia ka edhe probleme të tjera, qoftë më shumë apo më pak politike, por sidomos probleme teknike.

Sa i përket zbatimit të legjislacionit, do të thoshja se nuk janë bërë ato që prisja se mund të ishin të bërë. Kjo nuk do të thotë se nuk është bërë punë. P.sh., edhe centrali telefonik (Call Center) që përuruam javët e fundit në ministrinë e brendshme, është një masë që u ofron lehtësi atyre që kanë aplikuar për nënshtetësinë. Në dy javët e ardhshme do të fillojmë të hedhim në internet se ku gjendemi me aplikimet. Çka do të thotë që secili aplikant do të mundë të shikojë se kur përafërsisht do të kalojë për testin. Për fat të keq, mund të jetë pas tre vjetësh, mirëpo do të ketë një datë të përafërt se kur do të kalojë për intervistën. Nëse e sheh se kjo vonon, do të duhet të shqetësohet se mos diçka po shkon gabim. Nëse dikush kalon shumë shpejt, atëherë do të shqetësohemi ne dhe më besoni, po shqetësohemi faktikisht. Ajo që u përpoqëm të bëjmë dhe mendoj se ka rëndësi ta themi, është pikërisht që të reduktojmë sa më shumë që të jetë e mundur -dhe besoj se ia kemi arritur – ndërhyrjet e ndryshme, logjikat e shtetit klientelist. Me gjithë këto besoj se kemi bërë një punë të pabujë, që në shumë raste nuk e kupton as i interesuari. Mirëpo është bërë vërtet një punë e mirë, e cila nuk është e lehtë për t’u reklamuar.

Pra, jam i kënaqur vetëm në këtë drejtim. Në drejtimin e ndërhyrjeve institucionale që do të jepnin një shtysë tjetër, besoj se mund të bëj autokritikën time dhe të them që po, janë bërë disa gjëra, por përpjekja jonë nuk është finalizuar – ta them kështu...

 

TV TRIBUNA: Rrjedhimisht, ajo “ndjenja e të drejtës për emigrantin” që thoshnit para disa muajsh, nuk është përmbushur 100%, por ka nisur të duket...

LAMBROS BALTSIOTIS: T’jua them ndryshe: le të vijë cilido qytetar shqiptar emigrant i ligjshëm e të më thotë që në X qark mikun tim e kaluan një vit para meje. Në kohën që aplikimin e kishim bërë bashkë. Me përjashtim të rastit që tjetri mund të ketë pasur një arsye madhore, një problem shëndeti. Do ta shohim, besoj se incidente të tilla sot nuk ka.

 

TV TRIBUNA: Besoj që po të ekzistonin do ta merrnim vesh të pakën ne, që jemi gjithë ditën rrugëve...

LAMBROS BALTSIOTIS: Madje po ju them që bëmë edhe qarkoren mbi përshpejtimin (epispefsi) që ndoshta mund të jetë shumë rigoroze; mirëpo është që, ose të përfshin qarkorja, ose nuk të përfshin, të mos lemë asnjë “dritare”. Ndoshta disave u bëhet me të padrejtë, mirëpo nuk bëhej ndryshe. Dhe e bëmë në këtë mënyrë që edhe ata të cilët bëhen pjesë e shtetit grek si qytetarë të tij tashmë, të vetëdijesohen për një logjikë të ndryshme, jo atë mentalitet që e kanë edhe shumë grekë, sipas të cilit “në Greqi çdo gjë bëhet me një telefon, me baxhanakun, me ndërhyrjen e një politikani”...

 

Z. Baltsiotis u përgjigjet pyetjeve të bashkatdhetarëve tanë

TV TRIBUNA: Zoti Baltsiotis, kur paralajmëruam intervistën me ju, na u drejtuan shumë pyetje nga shikuesit dhe lexuesit tanë. Do të doja t’ju përcillja disa prej tyre, më përfaqësueset...

 

BLATSIOTIS: Sigurisht... Mjaft që të mund t’u përgjigjem...

- Njeri shkruan: “Jam nga emigrantët e parë të ligjshëm në Greqi, kam leje dhjetëvjeçare dhe jam invalid, mosha 60 vjeç. A kam të drejtë të marr nënshtetësinë greke?”. Njëlloj dhe një zonjë, invalide gjithashtu: “Kam invaliditet mbi 60%. Përse nuk na japin nënshtetësinë, apo thjesht paguajmë dhe pastaj presim deri sa të vdesim”...

LAMBROS BALTSIOTIS: Shikoni, në reformat që do të shkojnë në parlament ditët e ardhshme – dhe e përsëris që jemi të vonuar- do të ketë dhe dispozita për invalidët. Kjo nuk do të thotë se invalidët, ata që kanë invaliditet fizik, do të përjashtohen nga çfarëdolloj testi. Vetëm kur invaliditeti lidhet me një aftësi të kufizuar të tyre që të marrin pjesë qoftë në testin e njohjes së gjuhës, qoftë në testin e pyetjeve, do të kemi një farë ndryshimi. Dhe meqë ndodhemi në Greqi dhe në çdo rast dua të eliminoj mundësinë që të ketë raste të çfarëdollojshme korrupsioni, ka gjasë që qarkorja e zbatimit do të mund të zgjasë edhe një muaj më shumë. Dua t’ju them plotësisht të vërtetën.

- Dikush tjetër thotë: “A mund ta pyesni sekretarin e shtetit, kam 24 vjet në Greqi, përfundoj studimet e larta, kam kryer arsimimin në Greqi dhe nuk kam marrë pasaportë”. Me gjasë don të thotë nuk kam marrë nënshtetësinë. Kam përshtypjen se ky nuk është i mirinformuar.

BALTSIOTIS: Qartë. Nuk e di nëse ai ka ndjekur shkollen në nivelin e parë dhe të dytë. Nëse i ka kryer, do të duhej të kishte aplikuar për nënshtetësinë. Por edhe nëse nuk i ka kryer dy nivelet e sistemit shtetëror dhe ka mbaruar një shkollë me program grek, nga momenti që është në universitet, edhe sikur mos t’i ketë mbaruar studimet e larta, mund të bëjë kërkesë për natyralizim dhe gëzon mundësinë e përshpejtimit (epispefsi), nëse ka kaluar në një numër të konsiderueshëm të lëndëve. E kemi parashikuar edhe këtë. Në kuptimin që japim një avantazh për raste të tilla që përfundojnë studimet e larta në Greqi dhe natyrisht, nëse kanë vitet e qëndrimit që thotë ligji.

- Një tjetër pyet, përse duhet t’i paguajmë që në fillim ato 700 eurot. Përse të mos kalojmë më parë nga testi dhe pastaj të paguajmë.

BALTSIOTIS: Në radhë të parë, nuk e di nëse e thamë që paravolo do të bëhet 550 euro. Ka vërtet një dy vende në Bashkimin Europian që e ndërlidhin pranimin apo jo të aplikimit me tarifën (paravolon). Domethënë, po të dështosh, paravolo të kthehet. Mirëpo në Greqi, dhe nuk i referohem vetëm faktit se shumica e vendeve të BE-së nuk e kanë këtë sistem, por në Greqi paravola të tilla, jo vetëm për nënshtetësinë, por në shumicën e praktikave të funksionimit administrativ kanë atë që themi karakter kontribues (antapodotiko), domethënë që nga momenti që administrata do të merret dhe do të konsumojë orë pune, duhet të paguhet parovolo. Me këtë rast, dua t’ju paralajmëroj që në ndryshimet e reja do të përfshihet edhe vendosja paravolos edhe për ankimimet (antiriseis). Është vërejtur një abuzim me ankimimet kundër rasteve të refuzimit të natyralizimit. Nuk i di arsyet -po mund të supozoj disa që nuk mund t’i them publikisht. Shumë njerëz të cilët është e qartë se me të drejtë nuk e kaluan testin e gjuhës dhe atë që themi të integrimit, bëjnë ankimime duke krijuar një vonesë deri në dy vjet për shqyrtimin e ankimimit, në kohën që do të mund të bënin një aplikim të ri për politografisi. Dhe gjithashtu në kohën që është e qartë se ankimi i tyre nuk do të ketë asnjë fat nga Këshilli i Nënshtetësisë që shqyrton ankimimet. Çfarë të bëjmë, testi edhe në Greqi, është ashtu si dhe në vende të tjera, po të mos dish disa gjëra tëc aktuara nuk mund të marrësh nënshtetësinë.

 

- Një pyetje tjetër: Përderisa fëmijtë tanë kanë marrë nënshtetësinë, përse ne duhet të kalojmë nga testi?

BALTSIOTIS: Nuk ka vend të Europës që e bën këtë, do të kalojë edhe ai nga testet.

 

- Se kur do të hyjë në fuqi ligji i ri, si do të bëhen intervistat, banka e pyetjeve, këto i thamë...

BALTSIOTIS. Besoj se aty do të zhduken edhe ato spekulimet shumë të përhapura dhe në shumicën e rasteve të padrejta se ka korrupsion, se paguhen nën dorë. Më besoni, nuk them se nuk pati ose madje edhe tani nuk mund të ketë. Mirëpo janë shumë të pakta tashmë. Mundet që në fillim të kishte, pas vitit 2010.... Mirëpo u luftuan në mënyrë të vazhdueshme nga vetë shteti grek dhe mendoj se sot jemi në një nivel të shkëlqyer. Ka shumë spekulime. I kam dëgjuar dhe t’ju them të drejtën, jam nervozuar e jam zënë dhe me miq të mi për këtë çështje pse konsiderojnë... Kam një rast konkret nga një zonë e caktuar e vendit që vërtet kishte problem me vështirësinë e pyetjeve, ishin jashtëzakonisht të vështira, asnjë lidhje me atë që kërkonte ligji. Në fakt është përmirësuar tani, konsideronte se te ai komision duhej të paguaje para që të paguaje. Jo, nuk është aspak kështu, Nuk them për rastin që i thonë dikujt “jep para” dhe ai mendon se kështu është. Munden vetë njerëzit dhe sidomos qytetarët shqiptarë që kanë vite në Greqi të bëjnë gjithçka vetë, dhe të kërkojnë gjithmonë ndihmën e shërbimeve tona. Pa avokatë, pa asnjë njeri, dhe në rast se ndeshen me vështirësi, këtu jemi ne...

 

TV TRIBUNA: Para se ta mbyllim po ju bëj sërish pyetjen e fillimit pse kam përshtypjen që nuk më dhatë përgjigje: Ju pyeta nëse gjatë kohës që po përgatisnit ndryshimet e reja apo kur u votuan në parlament, u përballët me vështirësi, jo ju personalisht, por në përgjithësi...

LAMBROS BALTSIOTIS: Deri tani nuk mund të them se ka pasur vështirësi apo se ekzistonte një polarizim; sistemi politik nuk besoj se reagoi në mënyrë negative. Vështirësitë konsistonin në faktin se  njerëzit gjithmonë kanë  një alergji me të renë – është karakteristikë e jona kjo. Aq më tepër administrata greke. Aty kemi një problem. Por nuk mund të themi që pati reagime ndaj ndryshimeve p.sh., nga një parti e caktuar, apo një grup i caktuar njerëzish. Besoj se po avancojmë me kujdes, marrim parasysh pikëpamje të ndryshme, me mendim konkret se çfarë duhet të bëhet me nënshtetësinë në Greqi dhe që në masë të madhe nuk ka të bëjë veçse -kryesisht – se si do të mundë Greqia të bëhet plotësisht një shtet i të drejtës në këtë pjesë. Për fat të keq, kemi dhe pengesat e të kaluarës që na ndjekin – nuk e kam fjalën për qeveritë e mëparshme, e kam fjalën për një mentalitet të administratës publike dhe të shtetit që me gjasë nuk është dhe politika pa përgjegjësi që lidhet me nënshtetësinë. Këto nuk ikin kollaj, për fat të keq nevojitet pak kohë.

 

TV TRIBUNA: Në mbyllje të kësaj interviste, druaj se duhet t’ju urojmë bashkatdhetarëve tanë që të bëjnë edhe pak durim...

BALTSIOTIS: Për fat të keq, duhet të bëjnë durim.  Një nga qëllimet për të cilat u krijua ky sekretariat ishte pikërisht që të futet në një rend dhe të kemi një përshpejtim të procedurave – kjo ishte dhe një preokupim i ish ministrit të brendshëm, zotit Skourletis, por ishte nga gjërat e para që më shtroi edhe ministri i ri, zoti Haritsis. Për fat të keq, në disa gjëra nuk shkuam aq shpejt sa dëshironim – duhet ta them këtë. Kemi bërë disa mendime, edhe personalisht, edhe si administratë, se përse nuk shkuam kaq shpejt sa donim dhe e përsëris, kur them “shpejt” kam parasysh të kemi një shtet me administratë eficente dhe asgjë tjetër. Shpresoj që brenda muajve të parë të 2019-s, me këto ndryshime, do të arrijmë diçka që do të jetë qartësisht e perceptueshme edhe nga vetë aplikantët.

Ndaje me miqte