Lufta në Ukrainë, FMN ul pritshmëritë për rritjen e ekonomisë shqiptare

ATSH 25 Prill 2022

Fondi Monetar Ndërkombëtar (FMN) ka ulur ndjeshëm pritshmërinë për rritjen ekonomike të Shqipërisë, ku pritet një ngadalësim për shkak të luftës në Ukrainë.

Në raportin e prillit të “Pasqyrës Ekonomike Globale”, të publikuar sot, FMN parashikon që ekonomia shqiptare do të rritet ketë vit me vetëm 2 %, nga 4.5 % që ishte parashikimi në muajin tetor.

Edhe Agjencia ndërkombëtare e vlerësimit të kredibilitetit “Moddy’s” rishikoi me ulje parashikimin e saj të rritjes së PBB në përkatësisht 3.4 % dhe 3.6 %, (nga 4.5 % dhe 4.0 % që e kishte më parë), për shkak të ndikimit ekonomik negativ, kryesisht indirekt, të konfliktit ushtarak Rusi-Ukrainë dhe sanksionet ndërkombëtare të vendosura ndaj Rusisë.

Moddy’s rikonfirmoi vlerësimin e ekonomisë shqiptare në “B1 – me perspektivë të qëndrueshme”, në rifreskimin e publikuar së fundmi (13 prill).

Ndërsa sipas Bankës Europiane për Rindërtim dhe Zhvillim (BERZH), ekonomia e Shqipërisë pritet të zgjerohet me 3.3 % në vitin 2022, duke u ulur me 0.4 pikë përqindje, në krahasim me projeksionin e muajit nëntor.

INSTAT bëri të ditur se ekonomia shqiptare shënoi një rritje të fortë në vitin 2021, pas tkurrjes për shkak të kufizimeve nga pandemia e COVID-19 në 2020-ën.

Ndaje me miqte