Legjislacion: të drejtat që ofron leja biometrike e qëndrimit

TV TRIBUNA 25 Gusht 2019

Greqia ka adoptuar me më shumë se dhjetë vjet vonesë udhëzimet e Komisionit Europian për lejet biometrike të qëndrimit.

Dhe po me vonesë ka publikuar edhe të drejtat që ka poseduesi i kësaj lejeje.

Në nenin 21A të Kodit të Emigracionit është bërë kjo shtesë:

Trajtim i barabartë i punonjësve të pajisur me leje unike qëndrimi (biometrike).

1. Punonjësit e pajisur me leje qëndrimi unike gëzojnë të njëjtin trajtim me vendasit sa i përket:

a) të drejtën e hyrjes dhe qëndrimit në territorin grek si dhe qarkullimin e lirë, me kufizimet që parashikon ligji (zona të sigurisë, etj.),

b) të drejtën për të ushtruar veprimtarinë për të cilën kanë marrë vizën hyrëse.

c) kushtet e punësimit, përfshirë limitin minimal të moshës për punë, konditat e punës, përfshirë kushtet e pagës dhe të largimit nga puna, orarit të punës, të lejeve dhe ditëve të pushimit, si dhe kërkesat lidhur me shëndetin dhe sigurinë në vendin e punës.

d) të drejtën për grevë dhe veprimtarinë sindikale, sipas legjislacionit kombëtar, lirinë e grumbullimit, të aderimit dhe pjesëmarrjes në shoqata punonjësish apo punëdhënësish apo çdo lloj shoqate profesionale, përfshirë avantazhet që ofrohen nga këto organizata ndërmjet të cilave të drejtën e negocimit dhe lidhjes së kontratave kolektive, të gjoitha këto, me rezervën e dispozitave që lidhen me rendin publik dhe sigurinë publike.

e) edukimin dhe kualifikimin profesional.

f) njohjen e diplomave dhe aftësive të tjera profesionale, sipas legjislacionit kombëtar.

g) dispozitat e legjislacionit kombëtar lidhur me degët e sigurimeve shoqërore.

h) aty ku ekzistojnë marrëveshje dypalëshe, pagesën e pensionit të pleqërisë në nivelin që parashikon legjislacioni kombëtar apo legjislacioni i vendeve anëtare të BE-së.

i) Aksesin në asetet dhe shërbimet që disponohen për publikun, përfshirë procedurat për sigurimin e strehimit dhe të shërbimeve të informacionit dhe konsulencës që ofrojnë shërbimet e punësimit.

j) Avantazhet tatimore, me kusht që punonjësi të konsiderohet se ka banesë tatimore në territorin grek.

2. Punonjësit që transferohen në një vend të tretë ose trashëgimtarët e këtyre punonjësve që jetojnë në një vend të tretë dhe përfitojnë të drejta prej tyre, marrin pensionet e ligjshme që u takojnë në bazë të punësimit të mëparshëm, me të njëjtat kushte si dhe kur punonjësit vendas shkojnë në një vend të tretë.

3. E drejta e trajtimit të barabartë nuk u ofrohet:

- Sa i përket dispozitave të legjislacionit kombëtar që kanë të bëjnë me kompensimet familjare dhe kompensimet e papunësisë, për shtetasit e vendeve të treta që kanë ardhur për studime, si dhe atyre që punojnë me vizë pune.

- Sa u përket kompensimeve dhe kredive studentore dhe kompensime apo kredi të tjera që kanë të bëjnë me edukim apo kualifikim profesional dhe që lejohet të punojnë me vizë pune.

- Sa u përket avantazheve tatimore, në rastet kur banesa tatimore apo qëndrimi i familjes së punonjësit që kërkon kompensimet, nuk gjendet brenda territorit grek.

- Sa i përket aksesit në procedurat e strehimit për qytetarë të vendeve të treta që nuk punojnë.

Ndaje me miqte