Capital Controls, hiqen kufizimet në tërheqjen dhe transfertat e parave

Tribuna TV 28 Shtator 2018

Ministria greke e financave ka vendosur heqjen e kufizimeve në tërheqjen e parave cash nga depozitat, çka do të thotë se lirohet edhe më paketa e masave të njohura me emrin Capital Controls, që u vendosën në fund të qershorit 2015.

Me këtë vendim shfuqizohen plotësisht kufizimet në tërheqjen dhe qarkullimin e parave brenda vendit, si dhe fillon heqja graduale e kufizimeve edhe për transfertat e kapitaleve jashtë shtetit.

Vendimi përkatës është dërguar për publikim në Gazetën Zyrtare.

Më konkretisht:

- Që nga data 1 tetor 2018 lejohet tërheqja pa kufizim e shumave të parave nga institucionet bankare në Greqi, bankomate dhe sportele bankash.

- Që nga data 1 tetor lejohet tërheqja nga institucionet bankare jashtë shtetit deri në shumën 5.000 euro në muaj.

- Pas publikimit në gazetën zyrtare rritet limiti i transfertave jashtë shtetit të parave në valutë ose në euro, nga 3.000 euro që ishte deri tani, në 10.000 euro. Domethënë, lejohet që çdo individ të ketë me vete shumën deri 10.000 euro gjatë udhëtimeve të tij jashtë shtetit.

- Sa i përket biznesit, rritet nga 40.000 në 100.000 euro në ditë shuma që mund të dërgojnë jashtë shtetit në kuadër të veprimtarisë afariste.

“Ky vendim përbën një hap tjetër në kuadër të hartës rrugore për lirimin gradual të kufizimeve në tërheqjen e parave cash”, vihet në dukje në njoftimin e ministrisë greke të financave.

“Autoritetet synojnë të arrijnë heqjen e plotë të kufizimeve sa më shpejt që të jetë e mundur, duke garantuar në të njëjtën kohë stabilitetin afatgjatë financiar dhe makroekonomik”, shtohet në njoftimin e ministrisë së financave.

Ndaje me miqte