Gjermania hap tregun e punës edhe për shqiptarët

02 Dhjetor 2015

Shqiptarët nuk kanë shanse për azil politik, por Gjermania do të hapë rrugën për ardhjen legale të fuqisë punëtore nga vendet Ballkanit, ka deklaruar sekretarja e shtetit në Ministrinë gjermane të Punës dhe ?ështjeve Sociale, Anette Kramme. Në një intervistë televizive për “Deutsche Welle”, zonja Kramme ka deklaruar se vitin e ardhshëm Berlini do t’i hapë rrugë lëvizjes së ligjshme të fuqisë punëtore nga Ballkani drejt Gjermanisë. Zyrtarja gjermane pohon se viti 2016 do të shënojë hapjen e tregut të punës në Gjermani për shtetasit e Shqipërisë, Kosovës, Serbisë, Maqedonisë, Malit të Zi dhe Bosnjë-Hercegovinës. Sipas propozimeve të bëra deri më tani, parashikohet që të pranohen rreth 20.000 punëtorë nga këto vende. Ligji i ri do të jetë i vlefshëm deri në 2020, ndërkohë që do të bëhet dhe rivlerësimi i tij. Ata që do të munden të përfitojnë nga këto rregulla janë vetë Gjermania, por edhe vendet e rajonit të Ballkanit Perëndimor”, shprehet Anette Kramme. Lidhur me ndryshimet konkrete për këtë ligj, ajo thotë se: “Deri tani jemi në situatën ku emigrantët mund të vijnë në Gjermani vetëm nëse kanë ndonjë kualifikim të posaçëm. Ose kategorizohen si akademikë dhe mund të vijnë përmes Blu Card-it. Kjo është mundësia e parë. Mundësia tjetër është për personat me një profesion të caktuar, për të cilin rezulton se ka mangësi në Gjermani. Ne tani do ta hapim tërësisht tregun e punës për të ardhurit nga Ballkani, por me kushtin e parë absolut që të ketë një vend pune vakant”. Ndërsa, përsa i përket kushtit tjetër është, që për këtë të japë pëlqimin edhe Agjencia Federale e Punës, e cila bën të mundur njohjen e vendeve të punës që bëhet fjalë. Por që nuk ka ndonjë kandidat nga Gjermania apo nga shtetet e tjera të BE. Ndërkohë që është i qartë fakti se kushtet e punës duhet të jenë të barabarta. Për sa i përket Kosovës mbi problemin që kanë me vizat, i cili është edhe i vetmi vend i Ballkanit Perëndimor që nuk gëzon të drejtën e plotë për lirinë e lëvizjes pa viza në BE, Kramme thekson se autoritetet gjermane do të mundësojnë lehtësimin e procedurës së dhënies së vizave, e cila do të jetë më e shpejtë dhe më e thjeshtë.

Ndaje me miqte