Pasi ka mbyllur një fazë katëditore për përzgjedhjen e afro 170 talenteve, trajneri i kombëtares Josip Kuzhe, ka pranuar të prenoncohet me pak fjalë për gazetën “Tribuna”, kryesisht për taktikën që do të ndjekë në këto eleminatore.

“Teknikisht unë nuk preferoj të ndryshoj skemën e skuadrës që drejtoj dhe përpiqem ti përshtat lojtarët edhe psikologjikisht sipas kundërshtarit’’, shpjegon zoti Kuzhe. “Nuk mendoj se është e duhura që të ndryshoj edhe skemën sipas çdo takimi të radhës. Në anën sulmuese përpiqem tu jap vazhdimisht udhëzime lojtarëve të mi, pasi jam i vetmi person që mund ti harmonizoj ata në lojë dhe harrojeni anarkinë e futbollit, ku çdo lojtar vepron sipas dëshirës. Asnjëherë futbollistët nuk mund të orientojnë veten e tyre në fushë më mirë se trajneri dhe ky është një element të cilit i jap shumë rëndësi”, shton tekniku në lidhje me organizimin e ekipit kuqezi, për të theksuar edhe filozofinë sulmuese. “Kryesisht sulmojmë me sa më shumë forca të jetë e mundur, por duke qenë se nuk jemi një superfuqi, ruajmë me shumë kujdes edhe prapavijën. Skemat e sulmit për të arritur tek goli janë nga më të ndryshmet dhe është e pamundur t’ua shpjegoj një më një. Por, duhet patur parasysh se qoftë nga krahët, qoftë nga aksi, nuk ka rëndësi të madhe për mua, pavarësisht se klubet e mëdhenj luajnë më shumë aksin. Kjo ka të bëjë kryesisht me spontanitetin dhe si janë rrethanat e çastit’’, komenton Kuzhe në analizën e lojës së kombëtares, për të përfunduar me batutën e mbrëmjes: “Një orkestër e përkryer, kërkon edhe një dirigjent të përkryer, çka do të thotë se nuk luaj asnjëherë pa organizatorin e skuadrës, pra 10-shin klasik, zgjidhje kjo që na detyron të përdorim tre mesfushorë qendrorë dhe dy sulmues’’, ishte përgjigjja e tij në lidhje me pyetjen në qoftë se i pëlqen të përdorë lojtarin me tipare organizative të lojës në fushë.

Në lidhje me një talent të madh shqiptar si Abdurrahmani i AEKut, Josip Kuzhe tregoi se nuk e njihte me detaje, por kishte dëgjuar për të. “Të gjitha thirrjet i kishin marrë përsipër trajneri Artan Bushati i Shpresave dhe Ramadan Shehu i të rinjve. Përderisa ai nuk i është përgjigjur ftesës sonë, është e vështirë që ta sjellim këtu me detyrim”, komentoi Kuzhe, duke lënë të nënkuptojë se shpresat që Abdurrahmani të veshë fanelën kuqezi janë të pakta.



Konferenca e shtypit:

Në konferencën e shtypit të organizuar në një nga hotelet e sheshit “Omonia” të Athinës, Josip Kuzhe ka theksuar rëndësinë e zhvillimit të këtij kampi përzgjedhës për talentet dhe i është përgjigjur çdo pyetjeje të gazetarëve.

“E prisja që të shihja këtu talentë me shumë cilësi, pasi këta shqiptarë aktivizohen në klubet greke të cilat kanë nivel të lartë. Sigurisht që do i kërkoj Federatës të jem i pranishëm edhe në kampe të tjera, kurdoherë që ato do të zhvillohen”, ishin fjalët e para të Kuzhes në konferencën zyrtare.

Në lidhje me problemin maksimal, ku të rinjtë shqiptarë preferojnë kryesisht Greqinë për tu aktivizuar si përfaqësuese dhe se si mund ti joshim ne ata për ti veshur kuqezi, tekniku i kombëtares ka shpjeguar: “Mendoj se arsyeja kryesore që ata zgjedhin Greqinë është niveli më i lartë se yni që ka kjo kombëtare. Atëherë do të na duhet ta bëjmë ne përfaqësuesen tonë më të mirë, për ti rrëmbyer të gjitha talentet’’.

Kreu i pankinës së përfaqësueses, tregoi gjithashtu se ai preferon të grumbullojë kryesisht futbollistë që aktivizohen rregullisht dhe jo ata që janë në stol, pavarësisht emrit të klubit. “Midis një lojtari të Mançester Junaitid në stol dhe një lojtari bazë të Dinamos së Zagrebit, sigurisht do të preferoja këtë të fundit, pasi më intereson shumë aktivizimi i rregullt. Por më lejoni të shtoj këtu se edhe ai që është pjesë e Mançesterit, konsiderohet i rëndësishëm meqënëse ka mentalitetin e një klubi gjigand. Dhe kujdes me Dinamon e Zagrebit. Mos e nënvlerësoni se është një klub shumë i mirë”.

Gjithashtu në konferencën e shtypit ishte i pranishëm edhe trajneri i përfaqësueses U-19, i cili foli për rëndësinë që sjell puna e tij në lidhje me mbushjen e radhëve të Kombëtares A me lojtarë sa më cilësorë.

Ndërkohë, drejtori i zyrës së talenteve për FSHF-në në Greqi, Vangjel Çavo, ishte i vetmi nga podiumi i konferencës që foli për humbjen e Panajot Panos, futbollistit më të madh të Shqipërisë.

E Premte, 22 Janar 2010