Është një parti e re, që peshën kryesore e mori gjatë zgjedhjeve të fundit parlamentare në Maqedoni. Demkoracia e Re, që mban emrin e një partie greke gjatë zgjedhjeve presidenciale të vitit të kaluar u paraqit me kandidatin e saj, njëkohësisht kryetarin e partisë, Imer Selmani, që nga shumë këtu u konsiderua si Obama i Maqedonisë për shkak të faktit se ai si shqiptar, mund të ishte presidenti i ardhshëm i vendit. Pati një mbështetje të konsiderueshme në elektorat, si nga votuesit shqiptarë të zhgënjyer nga skena politike shqiptare, ashtu edhe nga elektorati maqedonas. Por jo të mjaftueshme për të bërë realitet fenomenin Obama për Maqedoninë.

Demokracia e Re (DR) është një parti e opozitës në bllokun shqiptar, e dalë nga një fraksion i Partisë Demokratike Shqiptare (PDSH), të udhëhequr nga Menduh Thaci. Drejtuesit e saj, mandatet e deputetit i kanë fituar në kohën kur ishin me PDSH-në, dhe të njëjtët kanë mbajtur poste të rëndësishme në ekzekutiv ose legjislativ gjatë kohës kur PDSH-ja ishte në pushtet. Vetë Imer Selmani ka qënë zëvendës kryeministër dhe ministër i shëndetësisë, në qeverinë e fundit të koalicionit VMRO DPMNE të kryeministrit Nikolla Gruevski me PDSH-në.

Partia gjithsesi në zgjedhjet lokale, nuk u paraqit ashtu sic pritej me ndonjë fitore të madhe. Partitë dominuese në skenën politike shqiptare në Maqedoni, Bashkimi Demokratik për Integrim (BDI) dhe PDSH, ndanë mes tyre komunat më të rëndësishme. Pas gjithë këtyre proceseve politike dhe pas vendimit të votuesve për dhënien e një vendi DR-së në skenën politike, kjo parti vendosi të mbajë kongresin e saj dhe gjithashtu të zgjidhte figurat drejtuese. Uniteti i kësaj partie këtu filloi të shkatërrohej.

Në kuvendin e partisë, që u zhvillua javën e kaluar nuk morën pjesë të gjithë anëtarët. Nga gjithsej 114, në mbledhjen e kuvendit ishin 85 anëtarë. Por pavarësisht këtij fakti, në kuvendin e DR-së u zgjodhën disa nga organet drejtuese të partisë. Kështu për kryetar të këshillit qendror, u zgjodh Kastriot Haxhirexha. Njëkohësisht u zgjodh edhe këshilli drejtues i partisë. Juristi Xhevir Imeri, profesorja e Universitetit të Europës Juglindore, Mirjana Sejdini dhe deputetët Flora Kadriu e Abedin Zymberi janë katër nënkryetarët e rinj të DR-së. Ndërkohë Fatmir Etemi do të jetë sekretar organizativ, ndërsa dy deputetët e tjerë Sulejman Ruishiti dhe Besim Dogani do të udhëheqin sekretariatin për punë të jashtme dhe për zbatimin e marrëveshjes së Ohrit. Por në këtë kuvend pati edhe heqje nga partia. Kështu u përjashtuan nga partia katër anëtarët e këshillit qendror: Adnan Azizi, Skender Rexhepi, Bilall Kasami dhe Nuriman Tefiku. Këta persona, sipas kryetarit të partisë Imer Selmani, janë larguar pasi kanë punuar në kundërshtim të interesave dhe statutit të partisë. Ndërsa të përjashtuarit thonë se me qëllim nuk janë kandiduar për postet e larta në parti.

Kuvendi, që zgjodhi edhe strukturat, erdhi pas një vale largimi të disa degëve të kësaj partie. DR-ja që në krijimin e saj ka pasur një marrëdhënie jep-e merr me PDSH-në. Fillimisht kur u krijua, synoi të merrte një pjesë të konsiderueshme të anëtarësisë së partisë së Thacit, ndërsa tani kjo pjesë e transferuar tek DR-ja, kalon në PDSH. Dorëheqjet nga DR-ja i arsyetojnë me përjashtimin e 4 anëtarëve themelues të DR në mënyrë arbitrare dhe në kundërshtim me statutin dhe mbajtjen e kuvendit të këshillit qendror, që sipas tyre ka qënë në mënyrë jo legjitime. Ata kanë njoftuar se aktiviteti i tyre do të vazhdojë në përputhje me vendimet e marra nga trupi koordinues i mandatar nga 15 këshillat komunal të Demokracisë së re.

Vetë Selmani thotë se partia po ecën në rrugë të mbarë dhe nuk i kanoset kriza e brendshme.

“Në parti ka rend, ka statut, ka procedura, në parti nuk lejohen shantazhe, kërcënime, a së paku lejohet që një grup joformal i sëmur ë për ambicie të veta personale të shantazhojë një parti të tërë. Kështu që është një proces i vetë largimit të atyre që nuk e gjejnë vetveten në Demokracinë e Re. Çdokush i cili do të shkel procedurat, statutin dhe programin e partisë, me vet faktin se shkel do të largohet nga partia shumë qartë. Çdokush i cili do të jap kontributin në parti, tëdëftohet me ide, me iniciativa, do të marrë vendin më të merituar dhe vendin më të lartë në strukturat dhe hierarkinë e partisë. Çdokush i cili lodhet, dëshpërohet është shumë normale të largohet dhe të pushojë pak”, argumentoi Selmani.

DR tashmë ka krijuar edhe qeverinë në hije që ka një axhendë të cilën duhet ta ndjekë për përmirësimin e gjendjes së shqiptarëve në Maqedoni, por edhe për hapjen e rrugës për integrimin e vendit në strukturat euro-atlantike. Në të njëjtën kohë cdo ditë vazhdon ikja e anëtarëve drejt PDSH-së.



E Premte, 22 Janar 2010